ఈ సమస్యలున్నవారు పొరపాటున కూడా చికెన్ ఎక్కువగా తినకూడదు.. ఇలా తింటేనే ఆరోగ్యం సేఫ్

చికెన్.. చాలా మంది ఇష్టంగా తినే ఫుడ్. కొంతమందికి చికెన్ లేనిదే ముద్ద దిగదు. ఇక, సండే వచ్చిందంటే చాలు చికెన్‌ను ఓ పట్టు పట్టాల్సిందే. అయితే, ఈ రోజుల్లో చాలా మంది వారంతో సంబంధం లేకుండా చికెన్, మటన్‌ను లాగిస్తున్నారు. చికెన్ బిర్యానీ, చికెన్ ఫ్రై, లాలీపాప్, చికెన్ 65, చికెన్ కూర్మా, చికెన్ సూప్, తందూరి చికెన్ ఇలా రకరకాల పేర్లుతో చికెన్ తింటున్నారు. ఇక, ఆల్కహాల్ తాగేవారు చికెన్‌ను స్టఫ్‌గా తింటున్నారు.

చిన్నా, పెద్దా తేడా లేకుండా చికెన్‌ను ఎక్కువగా తింటున్నారు. చికెన్ తినడం వల్ల శరీరంలో ప్రోటీన్స్ పెరుగుతాయి. నాటు కోళ్లు తింటే ఆరోగ్యానికి మంచిది.. ఫారం కోళ్లను ఎక్కువగా తింటే అనర్థం తప్పదంటున్నారు. వారానికి ఒకటి, రెండు సార్లు చికెన్ తింటే ఫర్వాలేదు. వారమంతా చికెన్ లాగిస్తే ప్రమాదం. అయితే, కొన్ని సమస్యలు ఉన్నవారు చికెన్ ఎక్కువగా తినకూడదంటున్నారు నిపుణులు. ఇంతకీ వారెవరో ఇక్కడ తెలుసుకుందాం.

అధిక కొలెస్ట్రాల్..

ఈ రోజుల్లో చాలా మంది అధిక కొలెస్ట్రాల్ సమస్యతో బాధపడుతున్నారు. అమెరికన్ జర్నల్ ఆఫ్ క్లినికల్ న్యూట్రిషన్‌లో పబ్లిష్ అయిన ఒక స్టడీ ప్రకారం చికెన్‌ ఎక్కువగా తింటే.. రక్తంలో చెడు కొలెస్ట్రాల్‌ స్థాయిలు పెరుగుతాయి. బాడీలో చెడు కొలెస్ట్రాల్ స్థాయిలు పెరిగితే.. గుండె సమస్యలు, హైపర్‌టెన్షన్‌, స్ట్రోక్‌ వచ్చే ప్రమాదం ఉంది. ఈ సమస్యలు ఉన్నవారు చికెన్ తక్కువ మోతాదులో తింటేనే మంచిదంటున్నారు నిపుణులు. అంతేకాకుండా చికెన్ తక్కువ తింటే ఈ సమస్యలు వచ్చే అవకాశం తగ్గుతుంది.

అధిక బరువు..

ప్రతిరోజూ చికెన్‌ తినడం వల్ల బరువు పెరిగే ప్రమాదం ఉందంటున్నారు నిపుణులు. చికెన్‌లో ప్రోటీన్‌ ఎక్కువగా ఉంటుంది. దీంతో... శరీరం బర్న్‌ చేయలేని అదనపు ప్రోటీన్ కొవ్వు రూపంలో నిల్వ ఉంటుంది. దీనివల్ల త్వరగా బరువు పెరుగుతారు. అందుకే ఇప్పటికే అధిక బరువు సమస్యలతో బాధపడే వారు చికెన్ ఎక్కువగా తినకూడదు.ఒక స్టడీ ప్రకారం, మనం తీసుకునే డైట్‌కు, బరువు మధ్య సంబంధం ఉంటుంది. శాఖాహారుల కంటే నాన్-వెజ్ తినే వారి శరీర ద్రవ్యరాశి ఎక్కువగా ఉంటుంది.

హైపర్ టెన్షన్ సమస్యలు..

కుటుంబంలో హైపర్‌టెన్షన్‌ హిస్టరీ ఉంటే.. అలాంటి వారు తినే ఆహారంలో చాలా జాగ్రత్తగా ఉండాలి. సంతృప్త కొవ్వు, ట్రాన్స్-ఫ్యాట్ ఎక్కువగా ఉండే ఆహారానికి దూరంగా ఉండటమే మంచిదని నిపుణులు చెబుతున్నారు. డైరీ ఉత్పత్తులు, రెడ్‌ మీట్‌, చికెన్‌ స్కిన్‌‌లో ట్రాన్స్‌ - ఫ్యాట్స్‌ ఎక్కువగా ఉంటాయి. అందుకే ఈ సమస్యతో బాధపడేవారు చికెన్ తక్కువ మోతాదులో తినాలి. ఎక్కువ తింటే సమస్య మరింత తీవ్రమయ్యే ప్రమాదముంది.

మూత్రనాళ ఇన్ఫెక్షన్..

ఈ రోజుల్లో రకరకాల చికెన్ వంటకాలు అందుబాటులో ఉన్నాయి. ఏ చికెన్ పడితే ఆ చికెన్ తింటే.. మూత్రనాళ ఇన్ఫెక్షన్‌ (UTI) వచ్చే ప్రమాదం ఉందని నిపుణులు చెబుతున్నారు. MBio, అమెరికన్ సొసైటీ ఫర్ మైక్రోబయాలజీ జర్నల్‌లో ప్రచురించబడిన ఒక అధ్యయనం ప్రకారం, చికెన్ ఎక్కువగా తింటే.. మూత్రనాళ ఇన్ఫెక్షన్‌‌‌‌తో సహా మరికొన్ని ఇన్ఫెక్షన్లు వచ్చే అవకాశం ఉంది. ఈ ఇన్ఫెక్షన్లకు దూరంగా ఉండాలంటే.. తాజా చికెన్‌ కొనడం, చికెన్‌ తక్కువగా తీసుకోవడం చేయాలి. చికెన్‌ను బాగా ఉడికించి తింటే ఈ సమస్యలు రావంటున్నారు.

అధిక యూరిక్ యాసిడ్..

​అధిక యూరిక్ యాసిడ్ స్థాయి ఎవరికైనా ఇబ్బంది కలిగించవచ్చు. శరీరంలో యూరిక్ యాసిడ్ స్థాయి పెరిగిన తర్వాత, క్రమంగా ఈ యూరిక్ యాసిడ్ గట్టిపడటం ప్రారంభిస్తుంది. ఈ స్ఫటికాలు (యూరిక్ యాసిడ్ స్ఫటికాలు) చేతి వేళ్లు, కాలి వేళ్లు, వేరే కీళ్లలో పేరుకుపోతాయి. దీంతో.. కీళ్లనొప్పుల సమస్యతో బాధపడతారు. మూత్రపిండాల సమస్యలు వచ్చే అవకాశం ఉంది. ఈ సమస్యతో బాధపడుతున్నవారు చికెన్ ఎక్కువగా తినకూడదు. ఇలా చికెన్ ఎక్కువగా తింటే బాడీలో యూరిక్ యాసిడ్ లెవల్స్ పెరిగే ప్రమాదముంది.

చికెన్ ఎలా తినాలి..

చికెన్ ఎలా పడితే అలా తింటే ఆరోగ్యానికి మంచిది కాదు. చికెన్ ఫ్రై, డీప్ ఫ్రై, చికెన్ పకోడి, చికెన్ బర్గర్లు లాంటి వాటికి దూరంగా ఉండాలి. తాజా చికెన్ కొని వండి తినడం మంచిది. అంతేకాకుండా చికెన్‌ను ఎక్కువగా ఉడికించి తింటే ఆరోగ్యానికి మంచిదని నిపుణులు చెబుతున్నారు. ఇంట్లో వండి తింటే బెస్ట్. బయట దొరికే చికెన్ ఐటమ్స్‌కి దూరంగా ఉండటమే మేలు అంటున్నారు నిపుణులు.

గమనిక..

ఇది సోషల్ సమాచారం మాత్రమే. కొన్ని అధ్యయనాలు, సంబంధిత నిపుణుల ప్రకారం ఈ వివరాలు అందించాం. వ్యక్తుల ఆరోగ్యాన్ని బట్టి ఫలితాలుంటాయి. వీటిని పాటించేముందు.. సంబంధిత నిపుణుడిని సంప్రదించడం శ్రేయస్కరం. అలాగే, హెల్తీ లైఫ్ స్టైల్, సరైన ఆహారం కూడా తీసుకోవడం మీ ఆరోగ్యానికి ఎంతో మేలు.